Persónuvernd
Stutta útgáfan: við söfnum því sem þarf til að afgreiða pöntunina þína, teljum heimsóknir án þess að vita hver þú ert, deilum engu með neinum nema burðaraðilanum og eyðum þínum upplýsingum ef þú biður um það.
Hvaða upplýsingum söfnum við?
Þegar þú pantar gefurðu upp nafn, netfang, símanúmer og heimilisfang. Þessar upplýsingar berast okkur í tölvupósti og eru eingöngu notaðar til að afgreiða pöntunina — staðfesta greiðslu, senda pakkann og hafa samband ef eitthvað kemur upp á.
Hverjir fá upplýsingarnar?
Nafn, heimilisfang og símanúmer fara til Dropp svo hægt sé að afhenda pakkann og láta þig vita með SMS. Að öðru leyti deilum við upplýsingunum þínum ekki með neinum og seljum þær aldrei.
Vafrakökur og það sem vafrinn geymir
Síðan notar engar vafrakökur, ekkert auglýsingaeftirlit og enga utanaðkomandi mælingaþjónustu. Þrennt er þó geymt í vafranum þínum sjálfum:
- Karfan. Við geymum hana hvergi hjá okkur — aðeins auðkenni flíkanna liggja í vafranum þínum. Þegar karfan birtist sendir vafrinn þau til okkar svo við getum flett upp verði og hvort flíkin sé enn til; uppflettingin er ekki vistuð.
- Pöntun í vinnslu. Meðan þú ert hjá greiðsluþjónustunni geymir vafrinn pöntunina þína svo hún týnist ekki á leiðinni til baka.
- Nýlega skoðað. Auðkenni síðustu flíka sem þú skoðaðir, svo hægt sé að sýna þér þær aftur neðst á vörusíðu.
Allt þetta hverfur ef þú hreinsar vaframinnið fyrir bhclothing.is, og ekkert af því fylgir þér yfir á aðrar síður.
Mælingar á versluninni
Við teljum hvað er skoðað, hvað fer í körfu og hve oft greiðsla er hafin. Það er gert til að sjá hvaða flíkur vekja áhuga og hvar fólk gefst upp í ferlinu — ekki til að fylgjast með einstaklingum.
Engin vafrakaka er sett, ekkert er geymt í tækinu þínu vegna þessa, og IP-talan þín er hvorki lesin né vistuð. Auðkennið sem tengir saman smelli innan einnar heimsóknar er slembitala sem verður til í minni vafrans og hverfur um leið og þú endurhleður eða lokar flipanum.
Þess vegna teljum við heimsóknir en ekki fólk: komir þú aftur á morgun telst það sem ný heimsókn, og við höfum enga leið til að vita að það sért þú. Af sömu ástæðu fylgir engin samþykkisbeiðni um vafrakökur — það er ekkert að samþykkja.
Tölurnar sjást aðeins okkur og fara hvorki til auglýsenda né annarra þriðju aðila.
Póstlistinn
Skráir þú þig á póstlistann geymum við netfangið þitt, hvenær þú skráðir þig, hvar á síðunni það var, og orðalag samþykkisins eins og það stóð þegar þú smelltir. Grundvöllurinn er samþykki þitt, og eina notkunin er að láta vita þegar nýtt dropp opnar.
Listinn fer ekki í neina utanaðkomandi þjónustu. Hann er geymdur hjá okkur og bréfin eru send handvirkt, svo afskráning gildir strax og enginn þriðji aðili fær netfangið.
Hverju bréfi fylgir afskráningarhlekkur sem virkar í einum smelli og krefst engrar innskráningar. Þú getur líka sent línu á bhclothing@bhclothing.is. Netfangið er geymt þar til þú skráir þig af listanum, og er eytt alveg ef þú biður um það.
Skráningin geymir ekkert í vafranum þínum — kaflinn hér að ofan um vafrakökur á áfram við óbreyttur.
Réttindi þín
Þú getur hvenær sem er beðið um að sjá, leiðrétta eða láta eyða þeim upplýsingum sem við höfum um þig — sendu póst á bhclothing@bhclothing.is. Ef þér finnst við ekki standa okkur er hægt að kvarta til Persónuverndar (personuvernd.is).